Një ngjarje e rëndë ka tronditur opinionin publik. Kreshnik Tomai, babai i tre fëmijëve, ka ndërruar jetë në Spitalin e Traumës, pasi qëndroi 10 ditë në koma pas një aksidenti të rëndë që ndodhi më 24 gusht në Fier.
35-vjeçari u përplas nga një 17-vjeçar pa leje drejtimi që drejtonte një “Range Rover” pranë Shkollës së Muzikës në Fier, teksa po kalonte rrugën. Për shkak të plagëve të rënda, ai u transportua fillimisht në Spitalin e Fierit dhe më pas në Tiranë, ku për ditë të tëra luftoi për jetën në kujdesin intensiv – betejë të cilën nuk e fitoi.
Por për shumë shqiptarë, Kreshniku nuk ishte thjesht një viktimë aksidenti. Ai njihej si babai i Nikitës, vajzës së vogël 10-vjeçare që ka fituar zemrat e publikut me zërin e saj dhe ëndrrën për t’u bërë këngëtare. Kreshniku ishte gjithmonë pranë saj në çdo studio televizive, duke i dhënë mbështetje të pakushtëzuar.
“Është ëndrra e saj dhe unë do përpiqem t’ia plotësoj”, kishte thënë ai dikur në një intervistë, duke prekur zemrat e publikut me dashurinë dhe përkushtimin e tij si prind.
Në rrjetet sociale, dueti i babait dhe vajzës në TikTok kishte tërhequr shumë ndjekës dhe dashamirës. Ata ndanin momente të veçanta, me Nikitën që këndonte dhe Kreshnikun që e shoqëronte me krenari dhe dashuri.
Lidhur me ngjarjen, policia ka arrestuar të miturin që shkaktoi aksidentin, i cili po hetohet për “shkelje të rregullave të qarkullimit rrugor” dhe “drejtim mjeti në mënyrë të parregullt”, pasi lëvizte pa patentë.
Humbja e Kreshnikut është një tragjedi jo vetëm për familjen, por për të gjithë ata që njohën historinë e tij dhe të vajzës së tij të talentuar. Shqipëria sot vajton një baba, një shembull përkushtimi dhe dashurie.
