Shkruan: Saim Tahiraj
Sot është përvjetori juaj, Hero Salih! Sa herë vijnë përvjetorët, sjellin dhimbje, mall, por edhe krenari. Na mungon shumë, Hero Salih. I mungon familjes, shoqërisë, bashkëveprimtarëve dhe bashkëluftëtarëve, por më shumë se kurrë i mungon të vërtetës.Ju ishit vetë e vërteta mbi rezistencën e armatosur dhe luftën në Kosovë, andaj i mungoni të vërtetës, sepse vetëm përmes jush mund të shpjegohet kjo e vërtetë dhe të demantohet gënjeshtra e madhe që e trilluan “komandantët”. Kjo gënjeshtër po ia zë frymën Kosovës tash e 27 vite, dhe ajo është plotësisht e robëruar prej saj. Ah, sa ka nevojë Kosova jonë e dashur për lirinë e së vërtetës. Vetëm ju, me veprimtarinë tuaj të gjithmbarshme, mund ta sillni atë.Si politikan i kohës dhe drejtues i komunës së Deçanit, ishit krah mbështetës i fuqishëm i kërkesave gjithëpopullore. Ishit kryetar i Këshillit Koordinues të Partive Politike në komunën e Deçanit. Si jurist me përvojë, ishit anëtar i Shoqatës së Juristëve të Deçanit, ku me guxim të pashoq harmonizuat statutin e komunës me Kushtetutën e Kaçanikut.Ishit veprimtar i palodhur dhe pjesë e strukturave drejtuese të degës së LDK-së në Gjermani. Bashkëorganizator i grupeve të para që ushtruan në Surrel, si dhe komandanti i parë që i printe skuadrës prej 32 ushtarëve të armatosur që thyen kufirin shqiptaro-shqiptar. Koordinuat luftën guerile me udhëheqjen politike, me trurin e lëvizjes sonë, prof. Fehmi Aganin. Me sukses drejtuat shumë aksione guerile me njësitin gueril të Deçanit dhe koordinuat punët me njësitë tjera guerile në Kosovë.Me fillimin e luftës, ishit përkrah MMRK-së, kolonel Ahmet Krasniqit, dhe me grupin tuaj u bëtë krah i fuqishëm i tij. Ishit bashkëideator i pastrimit definitiv të kufirit famkeq shqiptaro-shqiptar, deri në rënien heroike më 19 prill – ditë e dhembjes së madhe, por edhe e krenarisë së madhe. Pikërisht këtu u përmbyll vazhdimësia juaj me këtë kufi: e filluat më 1991 dhe e përmbyllët më 1999.I gjithë ky bagazh i madh i veprimtarisë suaj ju bën figurën më të veçantë, më unike dhe më të respektuar nga të gjitha shtresat e shoqërisë shqiptare. Sot ju respektojnë dhe përkulen edhe ata që ju fyenin përmes pamfletit të LPK-së “Zëri i Kosovës”, edhe ata që ju penguan dhe fyen në luftë, të dirigjuar nga shtabi i LPK-së. Kjo është madhështia juaj, Heroi ynë – kur edhe kundërshtarët më ekstremë politikë përulen para veprës suaj madhore.Ju jeni e vërteta për rezistencën e armatosur, ju jeni e vërteta mbi luftën, ju jeni e vërteta e kombinimit të Lëvizjes Paqësore me Rezistencën e Armatosur, si filozofi politike e Presidentit Rugova. Kush përpiqet t’i ndajë këto dy anë të medaljes gabon shumë rëndë, sepse ato janë të farkuara mes veti fuqishëm ndër beteja të mëdha historike.Lavdi, Heroi ynë!
