Një ortek bore ka rënë në afërsi e Qendrës së Skijimit në Brezovicë dhe si pasojë është bllokuar edhe rruga.
Zëdhënësi i Policisë së Kosovës për Rajonin e Ferizajt, Kanun Veseli tha për Gazetën Insajderi se menjëherë është njoftuar kompania për mirëmbajtjen e rrugëve.
“Rreth orës 21:00 nga zyrtarët Parkut Kombëtarë “Sharri”, policia e stacionit në Shtërpcë ka pranuar një informatë se në afërsi të Qendrës së Skijimit në Brezovicë ka rënë një ortek i vogël bore dhe ka bllokuar rrugën. Menjëherë është njoftuar kompania për mirëmbajtjen e rrugëve, e cila ka dalë në vendin e ngjarjes dhe ështe duke punuar në pastrimin dhe lirimin e rrugës”, tha Veseli.
Ndërsa nga Ekipi i Shoqatës së Kosovës për Kërkim Shpëtimi kanë thënë se kanë bërë të mundur transportin deri në autoambulacën e cila nuk mund të arrinte në vendin e ngjarjes.
“Ekipi i Shoqatës së Kosovës për Kërkim Shpëtimi ka intervenuar në qendren e skijimit në Brezovic. Pas një arresti kardiak të një qytetari është bërë e mundur transporti deri në autoambulancen e cila kishte vështirësi për të arritur deri në vendin e ngjarjes”, thuhet në njoftim.
