Zemra” e flotës ruse ‘Moskva’ u fundos pasi u sulmua nga raketat ukrainase dhe më pas pati shpërthime të forta.
Gazeta britanike, The Mirror, sjell një pasqyrim të të gjithë ngjarjes, duke filluar nga momenti i sulmit, e deri te fundosja. Nga fotot satelitore anija “Moskva” mund të shihet e kapluar nga zjarri. Ndërkohë më shumë se 500 anëtarë të ekuipazhit u vranë.
Anton Gerashchenko, nga Ministria e Brendshme e Ukrainës, tha se “shpërthimi ishte aq i fortë, sa që anija u fundos brenda pak minutash”.
Gerashchenko tha se “i gjithë ekuipazhi i kryqëzorit Moskva vdiq”.
E vërteta për shpërthimin u fsheh qëllimisht nga zyrtarët rusë. Ndërkohë për marinarët e saj në Sevastopol u mbajt një ceremoni, pasi të afërmit e ekuipazhit kundërshtuan urdhrat rusë për të mos marrë pjesë.
Një kurorë u vendos pranë një statuje ku shkruhej: “Për anijen dhe marinarët”. Burime në Ukrainë kanë pohuar gjithashtu se kapiteni i anijes, kapiteni i rangut të parë, Anton Kuprin, 44 vjeç, u vra gjithashtu.
Por vdekja e tij nuk është konfirmuar ende nga Moska.
