Një figurë e pazakontë ka shkaktuar frikë, panik dhe kureshtje të madhe te qytetarët në disa zona të Kosovës. Bëhet fjalë për një person të maskuar, i cili është parë kryesisht gjatë orëve të natës, i veshur me një maskë me fytyrë të bardhë, ndërsa ajo që e bën edhe më të frikshme pamjen janë këmbët që ngjasojnë me ato të dhisë.
Pamjet e kësaj të ashtuquajture “fantazmë” kanë nisur të qarkullojnë me shpejtësi në rrjetet sociale, duke nxitur reagime të shumta, nga frika e deri te dyshimet se bëhet fjalë për një shaka të rrezikshme apo një provokim të qëllimshëm. Disa qytetarë pretendojnë se e kanë hasur figurën në rrugë të errëta apo zona periferike, ndërsa të tjerë thonë se kanë dëgjuar vetëm rrëfime nga të afërm apo fqinj.
Deri më tani, askush nuk e di se kush fshihet pas maskës, as cili është qëllimi i këtij veprimi. Autoritetet nuk kanë dhënë ende një deklaratë zyrtare lidhur me rastin, ndërsa qytetarët kërkojnë më shumë siguri dhe sqarime, sidomos pasi prania e kësaj figure ka shkaktuar frikë te fëmijët dhe të moshuarit.
Në mungesë të informatave zyrtare, rasti mbetet i mbështjellë me mister, ndërsa “fantazma” me fytyrë të bardhë vazhdon të jetë një nga temat më të diskutuara të ditëve të fundit në Kosovë.
