Sulmuesi i ri ka thyer rekorde në Champions League, duke u bërë lojtari më i ri në histori që shënon në tre ndeshje radhazi të kompeticionit, ndërsa mbrojtësit kundërshtarë shpesh kanë mbetur të pafuqishëm përballë driblimeve të tij.
Edhe ylli i Bayern-it, Harry Kane, është mes atyre që janë impresionuar nga fenomeni i ri. Pas një tjetër paraqitjeje madhështore të Karl-it, anglezi nuk kurseu elozhet.
“Ai është një lojtar fantastik. Nuk ka frikë të driblojë. Nëse vazhdon kështu, ka një të ardhme të jashtëzakonshme,” u shpreh Kane për BILD.
Kane madje pranoi se Karl mund të jetë një surprizë në listën e Gjermanisë për Botërorin: “Kush e di? Me atë që po bën, ka shanse reale.”
Karl ka treguar personalitet edhe në skenat më të mëdha, duke shënuar golin e vetëm të Bayern-it ndaj Arsenalit në Emirates këtë sezon. Pavarësisht moshës, ai shfaq qetësi, pjekuri dhe një vetëbesim që rrallë shihet te lojtarët e kësaj moshe.
Legjenda gjermane Lothar Matthäus është një tjetër mbështetës i zjarrtë i talentit të ri. Në Sky90, ai kritikoi stilin e kujdesshëm të gjermanëve për promovimin e të rinjve dhe kërkoi që Karl të thirret menjëherë në Kombëtare.
“Nuk ka asnjë arsye të mos e grumbullojmë. Nuk ekziston ‘shumë herët’. Nëse dikush është gati, atëherë duhet të ecë përpara,” theksoi Matthäus.
Karl po konsiderohet nga shumë si ylli i ardhshëm i futbollit gjerman, duke fituar zemrat e tifozëve dhe respektin e figurave të mëdha të sportit. Ndryshe nga talentet e tjerë që janë ngadalësuar nga dëmtimet, si Musiala, ai duket i përgatitur për presionin e madh që e shoqëron këtë ngritje të shpejtë.
Me rekorde, gola vendimtarë dhe superlativa nga një sulmues i nivelit të Harry Kane, rruga drejt Kupës së Botës nuk duket më thjesht një ëndërr për 17-vjeçarin—por një objektiv që po afrohet me shpejtësi.
