Mbrëmja e së dielës në “Big Brother VIP Albania 4” ka shpallur finalisten e parë zyrtare të këtij sezoni – dhe ajo është këngëtarja dhe aktorja e njohur Rozana Radi.
Rozana ishte pjesë e një televotimi të veçantë javor, ku përballë saj ishte banorja tjetër, Gerta. Publiku kishte në dorë të vendoste se cila prej tyre do të fitonte biletën drejt finales së madhe, e cila do të mbahet më 19 prill.
Pas një jave pritjeje dhe votimi, rezultoi se Rozana Radi ishte më e votuara, duke siguruar kështu një vend të merituar në finale dhe një hap më afër çmimit të madh prej 100 mijë eurosh.
Ky moment është pritur me emocion jo vetëm nga vetë Rozana, por edhe nga publiku dhe fansat e saj të shumtë që e kanë ndjekur gjatë gjithë rrugëtimit në shtëpinë më të famshme në Shqipëri. Me stilin e saj të drejtpërdrejtë, energjinë pozitive dhe përballjet e sinqerta, ajo ka arritur të krijojë një lidhje të fortë me publikun.
Me shpalljen e saj si finaliste e parë, Rozana Radi bëhet tashmë pjesë e garës për fundin e madh, ku konkurrenca do të ashpërsohet edhe më shumë në ditët në vijim. A do ta kurorëzojë ajo këtë rrugëtim me fitoren? Kjo mbetet për t’u parë në natën finale. /Telegrafi/
