Pas 23 vitesh, një deklaratë e Adem Demaçit, që asokohe udhëhiqte Zyrën e UÇK’së në Prishtinë, u aktualizua, të enjten që shkoi, jo për shkak të njeriut që njihet si simbol i rezistencës kosovare, por për shkak të Kryeministrit Albin Kurti, i cili ishte i angazhuar aty si sekretar për marrëdhënie me jashtë.
Më 2 mars 1999, për shkak të mospajtimeve me delegacionin e Kosovës në Rambuje, kjo zyrë kishte lëshuar një deklaratë, ku bënte të ditur se kishte vendosur ta ndryshojë karakterin e punës, duke mos shërbyer më si krah politik i saj ose si zëdhënëse e UÇK’ së në Prishtinë. Dje në një aktivitet të PSD’së u tha se pikërisht kjo ishte koha kur Kurti u largua nga UÇK dhe se pikërisht për shkak të kësaj ai s’mund të jetë veteran i UÇK’ së pasi ligji saktëson se veteran është ai person që ka qenë pjesë e UÇK’ së deri në fund të luftës. PSD e ka quajtur veteran të rrejshëm Kurtin dhe ka kërkuar hetime ndaj tij.
Por, pse Demaci kishte vendosur të tërhiqej ose ta ndryshonte karakterin e punës së zyrës duke e shndërruar në Zyrë të Adem Demacit për Analiza, Propozime e Këshilla Politike dhe cfarë thuhet në atë letër.
“E ndiejmë për obligim moral dhe historik të ritheksojmë se kjo marrëveshje e Rambujesë që po imponohet nuk do t’ia sjellë lirinë popullit shqiptar të Kosovës dhe nuk do ta çlirojë Kosovën nga robëria serbe. E ndiejmë për obligim moral e historik që të tregojmë se propaganda e paskrupullt e këtyre ditëve ka për qëllim që ta mashtrojë popullin duke dëmtuar çështjen e pavarësisë së Kosovës”, theksohej në letrën e nënshkruar nga Adem Demaçi.
Tutje aty thuhet se “Zyra e Udhëheqësit Politik të Ushtrisë Çlirimtare të Kosovës z.Adem Demaçi ka kryer me nder, përpikëri dhe ndërgjegje të lartë punën, aktivitetin dhe detyrat e veta.
“Ajo me konsekuencë është bazuar dhe ka ndjekur konceptet, parimet dhe bindjet e veta të cilat janë materializim i vullnetit politik të popullit të Kosovës të shprehur në Referendumin e shtatorit 1991” thekson letra.
Aty theksohet se Zyra e Demaçit dhe UÇK’ja kishin parime, ideale dhe koncepte të njëjta.
“ Mirëpo me daljen në shesh të disa individëve nga radhët e UÇK’së që po përgatiten të miratojnë marrëveshjen e Rambujesë punët ndryshuan. Ky numër individësh në këtë mënyrë braktisën parimet themelore të UÇK’së dhe obligimin ndaj vullnetit politik të shprehur në Referendumin e 1991” thekson letra.
Demaçi tutje shton se “Meqë ne kurrsesi nuk duam që zyra jonë të bëhet shkas për fërkime brenda UÇK’së, ne kemi vendosur që të ndryshojmë karakterin e punës së zyrës”.
“Ne kemi mbrojtur me këmbëngulje dhe kemi përfaqësuar në mënyrë dinjitoze luftën çlirimtare dhe kemi përfaqësuar në mënyrë dinjitoze luftën çlirimtare të popullit shqiptar për liri e pavarësi, bartëse e së cilës është UÇK’ja, por kjo rrugë e nënshkrimit eventual të kësaj marrëveshjeje nuk garanton pavarësinë e Kosovës prandaj ne edhe po tërhiqemi. Ne nuk mund ta kapërdijmë këtë marrëveshje sepse ajo është kundërshtim me bindjet tona dhe me idenë tonë për e lirë në trojet tona mijëvjeçare” përfundon letra.
Në këtë video mund ta ndiqni një raportim të mediave në Shqipëri rreth kësaj ngjarjeje.
