Është kryer me sukses fluturimi i parë i avionit luftarak turk pa pilot me emrin “Bayraktar Kizilelma” (Molla e Kuqe), raporton Anadolu Agency (AA).

Ky është avioni i parë luftarak turk pa ekuipazh.

Në mars të këtij viti, prodhuesi kryesor turk i mjeteve ajrore pa pilot, kompania Baykar, prezantoi prototipin e avionit luftarak turk pa pilot të quajtur “Bayraktar Kizilelma” (Molla e Kuqe), të cilin kjo kompani e zhvilloi me burime vendase.

Selcuk Bayraktar, kreu i Baykar, një kompani turke e mbrojtjes e specializuar në dronët dhe inteligjencën artificiale, ndau pamje të fluturimit të avionit të parë luftarak turk pa pilot në llogarinë e tij zyrtare në Twitter.

“Bayraktar Kizilelma” do të jetë ndër elementët më të fortë të forcave të sigurisë në fushën e betejës në të ardhmen me manovrat e tij agresive dhe inteligjencën artificiale të avancuar.

Punimet konceptuale të “Bayraktar Kizilelma” u shpërndanë për herë të parë për publikun më 20 korrik 2021 si dhuratë Bajrami në ditën e parë të Kurban Bajramit. Pas tetë muajsh, avioni luftarak pa pilot “Bayraktar Kizilelma” u fut në linjën e integrimit.

“Bayraktar Kizilelma”, i cili do të jetë në gjendje të zbarkojë dhe të ngrihet në anije me pista të shkurtra, si anija “TCG Anadolu”, të cilën Turqia e ka ndërtuar dhe aktualisht po kryen teste, do të luajë një rol të rëndësishëm në misionet jashtë shtetit. Me këtë aftësi ai do të marrë pjesë aktive në mbrojtjen e Atdheut Blu.

“Bayraktar Kizilelma”, i cili është i aftë të kryejë luftime ajër-ajër si avionë luftarakë të drejtuar me manovra agresive, do të ndryshojë ekuilibrin në fushën e betejës me këto aftësi, ndryshe nga mjetet ajrore pa pilot që janë zhvilluar me burime vendase dhe kombëtare dhe kanë një ndikim të madh në botë.

Avioni, studimet e zhvillimit të të cilit kryhen plotësisht nga inxhinierë dhe teknikë turq me përvojë të fituar në projektet Bayraktar TB2 dhe Bayraktar Akinci, do të sigurojë efektivitet kundër objektivave ajrore me municion vendas.

Karakteristika e prerjes tërthore të vogël të radarit, e cila konsiderohet si një nga çështjet më kritike në proceset e projektimit të avionëve luftarakë të drejtuar, është marrë parasysh edhe në projektimin e “Bayraktar Kizilelma”.

Avioni do të përdorë të gjithë municionin e zhvilluar nga inxhinierët turq dhe ngarkesa e planifikuar e tij është 1500 kilogramë. /tesheshi.com/