Shkruan Idriz Morina:
Përpjekja mashtruese e grupimit të VV-së në këto zgjedhje, për t’u deklaruar se brenda saj ka një grupim trashëgimie të Ibragim Rugovës, u mundua që në Skenderaj të prodhojë një inicident, që ta krijonte një relacion me Rugovën dhe LDK-në e pas luftës – viktimë e komandantëve.
Letra e Rexhep Qosjes e demanton dhe deshifron këtë mashtrim të Kurtit, dhe të gjithë atyre që po mundohen ta paraqesin Albinin si një rugovist, i viktimizuar nga “komandantët”!
Rexhep Qosja e konsideron veten, dhe nga të tjerët, si një bërthamë e të majtës, me qëndrime filokomuniste, por edhe filoserbe: Rexhep Qosja, kur bisedohej në Vjenë për statusin e Kosovës, kërkonte që veriu t’i jepej Serbisë – Si kompensim të mos kishte decentralizim në Kosovën e mbetur!
Pra, nuk është letra e Qosjes rastësi, as mbështetje aksidentale apo filozofike, por as përkrahja e vazhdueshme ndaj tij e Albin Kurtit.
Si mundet të jenë kaq miqësor, dhe pa kundërshtime politike, nëse Albini është sovranist si po e quajnë, me Qosjen antisovranist, që kërkonte pa shkëmbim territori, veriu t’i jepej Serbisë!
Kjo e dekodon projektin e Albinit për bashkim kombëtar, por që kurrë nuk deklaronte se kujt do t’i përkiste veriu në atë rast!
Pra, Albin Kurti, e donte bashkimin kombëtar, sipas modelit të Qosjes, që veriun t’ia jepte Serbisë, dhe pjesën e mbetur ta bashkonte!
Këtë e argumenton edhe gënjeshtra dhe mashtrimi se ai e ktheu sovranitetin e Kosovës në veri, dhe se është shpërbërës i strukturave paralele, ndërsa me marrëveshjen e Brukselit dhe aneksin e Ohrit, ka krijuar shtet paralel legal të serbëve, brenda Kosovës – një lloj republike apo autonomie të tretë serbe!
Ishte Rugova, i vetmi, deri në frymën e fundit, që veriun e shihte pjesë të Kosovës, të padiskutueshme!
Ai po mundohet vetëm për të vjelur vota, duke u shtirur se kinse ai tashmë e njeh reputacionin e Rugovës dhe e pranon frymën e Rugovizmit, ndërsa e mirëpret ose e porosit Qosjen, që të shkruajë letër mbështetëse, për ta përçuar mesazhin tek neokomunistët, e majta, enveristës dhe grupimet tjera, se ai është fryma e vërtetë antirugoviste!
Por, Kurti është edhe antipod elektoral i Rugovës.
Rugova, asnjëherë dhe në asnjë rast nuk i ka fyer kundërshtarët politik, as Qosjen, dhe as komandantët.
Në rastet e rralla, pas vrasjeve politike ka kërkuar hetime dhe drejtësi. Asnjëherë nuk i ka sulmuar institucionet e drejtësisë edhe kur nuk janë zbardhur vrasjet politike, duke kërkuar që ato të punojnë më shumë e më mirë, sikurse edhe të gjitha institucionet! Ndërsa, Albin Kurti i sulmon pa pushim sa herë hetohen dhe arrestohen bashkëpunëtorët e tij, edhe e kërcënoi prokurorinë e prokurorët, nëse guxojnë të shkojnë ta intervistojnë në Qeveri, edhe pse vazhdimisht thoshte le të shkojnë aty, se ai nuk shkon në institucionin e prokurorisë!
Rugova edhe në çdo tubim zgjedhor, e idealizonte aleancën me Amerikën, përveç se në diplomaci dhe në punën presidenciale, ndërsa Kurti i ka ulur në pikën më të poshtme, rekord negativ i zi!
Prandaj, Albin Kurti, sulmet e vazhdueshme deri në gjuhë të urrejtjes ndaj opozitës, që përveç AAK-së në krye të saj, nuk ka më komandanta, duket se i ka pasur dhe i ka për qëllim krijimin e incidentëve për të ndaluar rënien e lirë të Vetëvendosjes, që tashmë, sipas specialistëve të statistikave është mjaft më poshtë se 300 mijë vota!
Ky rezultat argumentohet edhe nga e dhëna se LDK, tashmë e ka mbidyfishuar voten, duke arritur në rreth 230 mijë, me tendencë rritjeje! Po ashtu ka rritje rreth 5% PDK nga 100 pikë, dhe një rritje së paku të lehtë AAK!
Prandaj, partitë opozitare, nuk duhet lejuar manipulimin e mbështetësve të tyre, që të krijojnë incidente ndaj Kurtit, të cilat mund të përgatiten edhe nga shërbimet antishqiptare!
