Kryetari i Partisë Demokratike, Sali Berisha, ka zhvilluar një konferencë për shtyp ku ka dënuar, siç e cilësoi ai, trajtimin çnjerëzor të ish-presidentit Ilir Meta në burg, duke kërkuar lirimin e tij të menjëhershëm.
Berisha deklaroi se Meta është një “i burgosur politik” dhe se ndaj tij nuk ekzistojnë, sipas tij, prova të faktuara për vepra penale. Ai shtoi se mënyra e trajtimit të Metës në procesin gjyqësor ngjason me praktika të së kaluarës totalitare.
Sipas tij, veprimet ndaj Metës janë të urdhëruara politikisht dhe përbëjnë, siç u shpreh, një formë hakmarrjeje ndaj opozitës.
Partia Demokratike kërkoi gjithashtu ndërhyrjen e institucioneve ndërkombëtare, përfshirë Këshillin e Europës, duke pretenduar shkelje të të drejtave të njeriut dhe standardeve demokratike. Në deklaratën e tij, Berisha u shpreh gjithashtu në favor të zhvillimit të seancave gjyqësore të hapura për publikun dhe median, duke theksuar se transparenca është standard i domosdoshëm në një shtet demokratik.
