Ish-kreu i Shërbimit Informativ Shtetëror (SHISH), Fatos Klosi, mbrëmë ka deklaruar se FARK-u nuk kishte ushtarë por vetëm oficerë, të cilët nuk ishin të gatshëm për sakrificë.
Ai madje tha se oficerët e FARK-ut vetëm shëtisnin me uniforma në Tiranë dhe kishin dëshirë të mburreshin.
E, pas këtyre deklaratave, “Bota sot” ka kontaktuar njërin prej njerëzve më të afërt të kolonel Ahmet Krasniqit.
Ish-bashkëpunëtori i kolonel Krasniqit, Saim Tahiraj, në një prononcim dhënë gazetës “Bota sot”, i është kundërpërgjigjur deklaaratave të ish-shefit të SHISH, Fatos Klosi.
Tahiraj deklaratën e fundit të Klosit e quan si skandaloze, derisa thotë se është vet ish-kreu i SHISH që duhet të përgjigjet për të gjitha veprimet banditeske kundër oficerëve të Ministrisë së Mbrojtjes.
“Kjo deklaratë skandaloze dhe tendencioze e cila nuk është e para por propagandë në vazhdimësi që ka për qëllim diskreditimin e vijës institucionale të udhëhequr nga presidenti Rugova. Njëzet vite pas lufte ende nuk ka arritur të lirohet nga urrejtja që ka ndaj atyre institucioneve, por vazhdon me ritmin e njëjtë propagandistik i cili shërbehët me shumë të pa vërteta, vetëm e vetëm që ta diskreditojë atë organizim institucional. Ky alamet krye SHISH-isti në vende që të japë llogari për të gjitha veprimet banditeske kundër oficerëve të Ministrisë së Mbrojtjes, si bastisje, kontrollime, arrestime, rrahje brutale e deri te vrasjet, pa fije turpi na shfaqet prapë me të njëjtën propagandë gënjeshtare dhe sulmon FARK-un”, shprehet fillimisht Tahiraj.
Ish-bashkëpunëtori i kolonel Krasniqit, Klosin e quan kriminel, dhe thotë se duhet të jap përgjegjësi për vrasjen e ministrit Ahmet Krasniqi, Ilir Konushevcit e disa të tjerëve të cilat ndodhën në Shqipëri.
“Si duket gjynahet që ka mbi supet e tija për vrasjet e oficerëve dhe ushtarëve të Ministrisë së Mbrojtjes të Kosovës të cilat ndodhën në Shqipëri, nuk po e lënë të qetë por po e shtyjnë në gabime e radhës për ta arsyetuar krimin. Ti o shpirt krimineli, së pari duhet të japësh llogari për vrasjen e ministrit Ahmet Krasniqi, Sadri Ramabajës, Ilir Konushevcit e disa të tjerëve të cilat ndodhën në Shqipëri kur t’i ishe i pari i SHISH-it. Ti ishe përgjegjësi kryesor dhe pikërisht t’i duhet të japësh llogari”, tha ai.
Sa i përket deklaratës se Klosit, ku tha se FARK-u nuk ka pasur ushtarë, Tahiraj shprehet se kjo është një gënjeshtër e madhe e tij.
Ish-ushtaraku tregon se shumë brigada që luftuan në Kosovë nën komandën e ministrit Krasniq e demantojnë bindshëm këtë gjë.
“Gënjeshtra e madhe që thua se FARK-u nuk ka pasur ushtarë, por vetëm disa oficerë në Shqipëri është vetëm tendenca e radhës për ta mbuluar krimin. Shumë brigada që luftuan në Kosovë nën komandën e ministrit Krasniqi e demantojnë bindshëm gënjeshtren tuaj. Shumë dëshmorë dhe heronjë që ranë në fushat e nderit, ballë për ballë me armikun shekullorë serbë e demantojnë gënjeshtrën tuaj”, ka pohuar ish-ushtaraku i UÇK-së.
Në fund, Tahiraj i bën thirrje Klosit që t’i zbulojë krimet dhe kriminelët që kryen ato krime makabre në Shqipëri, sa ky i fundit ishte në krye të SHISH.
“Betejat e Loxhës, Lukës, Carrabregut, Rugovës, Pashtrikut, Kosharës dhe shumë të tjera të cilat u komanduan nga oficerërt e FARK-ut, e demantojnë bindshëm gënjeshtren tuaj. Ti o propagandues gënjeshtarë leri më gënjeshtrat tua, por krimet dhe kriminelët që kryen ato krime makabre në Shqipëri zbulojë dhe dërgojë në organet e drejtësisë. Liro Shqipërinë tonë të dashur nga ajo barrë e rëndë tradhtie dhe turpi. Liro shpirtin tuaj nga ajo barrë e rëndë krimi dhe së paku shko në atë botën tjetër pa të. Mos u merrë më me këto gënjeshtra për FARK-un sepse historinë nuk e ndërton dhe shkruan ti, por faktet dhe dokumentacioni që mbështetet në të vërteten historike”, tha në fund Tahiraj.
