Katër muajt e fundit bota e kësaj nëne ka qenë mbushur nga vuajtjet e dhimbjet, përplot. Veçse Sadete Hasanit nuk i dhemb trupi, por i lëngon zemra, i vuan shpirti.
Prej 4 muajsh ajo sheh në pamundësi për të bërë diçka, sesi gjendja shëndetësore e të birit, Valtonit, përkeqësohet dita- ditës. Lotët i shkojnë rrëke, kur për një moment ajo rreket ta afrojë mendjen tek më e keqja…
“Këto 4 muaj jemi kan as në tokë e as në qiell. Frika më e madhe, po tutem mos po…(qan) Nuk mund ta mendoj, unë pa djalin. Ne jemi krejt të shokuar. Ma mirë Zoti ma kish çuar mua sëmundjen sesa djalit… (qan). “-rrëfen mes lotëve nëna, për “Shqiptarët për Shqiptarët”.
Valtoni është prekur nga tumori në fyt. Mjekët në Kosovë i kanë sugjeruar familjes Hasani që ta dërgojnë djalin urgjentisht për kurim jashtë shtetit, pasi në atdhe shanset janë të pakta. Por familja, thjesht nuk i ka mundësitë financiare për të përballuar kostot e larta.
Nëna vijon të vajtojë e vajtojë. Nuk mundet të kurojë dot të birin. Me aq pak forca sa i kanë mbetur, ajo u lutet, u përgjërohet kujtdo shqiptari që i ka munësitë, ta ndihmojnë.
“Valtoni është i ri, ka jetën përpara. Nëse qëndron këtu në Kosovë, është fundi për të. Na kanë thënë ta çojmë në Turqi, por ne nuk e kemi mundësinë, shuma është e madhe. U kisha lut krejtve, sadopak kush ka mundësi, me na ndihmu”
