Ky është momenti dramatik kur një anije ruse u hodh në erë nga forcat ukrainase, duke e thelluar kështu akoma edhe më tej poshtërimin e flotës së Putinit, që është detyruar të tërhiqet në disa zona. pamjet filmike të shpërndara në rrjetin social Twitter, e tregojnë anijen Orsk të përfshirë nga flakët në qytetin port ukrainas Berdyansk. Orsk dhe dy anije të tjera të Moskës ishin duke mbështetur nga deti avancimin e trupave ruse në qytetin e rrethuar të Mariupolit. Mësohet se shpërthimi ishte shkatërrimtar për të, ndërsa prej tij është dëmtuar dhe një tjetër anije e Kremlinit. Ushtria ukrainase pretendon se Rusia për shkak të humbjeve të mëdha që ka pësuar deri tani, po dërgon trupa të tjera në kufi. Në përditësimin e tij të fundit për konfliktin, Shtabi i Përgjithshëm i Forcave të Armatosura ukrainase thotë se” po zhvendosen njësi shtesë të forcave të armatosura të Federatës Ruse në kufijtë e Ukrainës”. Një muaj pas fillimit të luftës, Rusia është bllokuar në një luftë të lodhshme, të kushtueshme, të pasigurtë ushtarakisht dhe pa shenja se do të përfundojë shpejt. Ekonomia e saj është dëmtuar rëndë nga sanksionet, objektivat kryesore strategjike ruse janë ende të paplotësuara, ndërsa Kievi, edhe pse i bombarduar vazhdimisht por as nuk ka rënë e as nuk është rrethuar. /top-channel.tv/
Ukrainasit shpërthejnë anijen ruse, pamje dramatike të poshtërimit të Moskës!
