Ushtria amerikane ka bërë ndryshime të rëndësishme në strukturën e forcave të saj paqeruajtëse në Kosovë, duke rikthyer në komandën e KFOR-it ushtarë aktivë nga njësitë që kishin marrë pjesë në themelimin e misionit të NATO-s në vitin 1999. Ky zhvillim vjen në kohën kur Aleanca ka paralajmëruar zvogëlimin e numrit të trupave në Kosovë, për shkak të përmirësimit të situatës së sigurisë.
Gazeta ushtarake amerikane Stars and Stripes, në një artikull të publikuar më 16 tetor, raporton se ushtarët amerikanë në shërbim aktiv kanë marrë drejtimin e Komandës Rajonale Lindje të KFOR-it, duke zëvendësuar pjesëtarët e Gardës Kombëtare të Shteteve të Bashkuara, përcjell Reporteri.net.
Ky është një ndryshim i rëndësishëm në mënyrën e organizimit të forcave amerikane në Kosovë, pasi prej më shumë se një dekade kjo komandë ishte udhëhequr nga njësitë e Gardës Kombëtare.
Pas 12 vjetësh, komanda u kthehet ushtarëve aktivë amerikanë
Sipas raportimit, pjesëtarët e Regjimentit të 2-të të Kalorësisë, me bazë në Vilseck të Gjermanisë, së bashku me njësitë mbështetëse të Divizionit të Parë të Këmbësorisë, morën të hënën komandën e KFOR-it për rajonin lindor.
Ceremonia e dorëzimit të komandës u zhvillua në bazën ushtarake amerikane Camp Bondsteel, në Kosovë.
Njësitë e reja zëvendësuan Brigadën e 53-të të Këmbësorisë të Gardës Kombëtare të Floridës.
Zëdhënësi i komandës, rreshteri Hunter Tate, ka konfirmuar se hera e fundit kur ushtarët amerikanë në shërbim aktiv kishin udhëhequr Komandën Rajonale Lindje ishte shtatori i vitit 2014.
Sipas tij, vendimi për ndryshimin e strukturës komanduese është marrë bazuar në disponueshmërinë aktuale të forcave dhe nevojat e misionit.
Komandanti i ri amerikan: Jemi të gatshëm të ruajmë sigurinë në Kosovë
Komandën e re e ka marrë koloneli amerikan Jabari Miller, i cili ka theksuar gatishmërinë e ushtarëve për të vazhduar misionin paqeruajtës.
“Ushtarët tanë janë në formë të mirë fizike, të motivuar, të disiplinuar, të trajnuar dhe të gatshëm të punojnë së bashku me aleatët dhe partnerët tanë të NATO-s për të ruajtur një mjedis të sigurt në Kosovë”, ka deklaruar Miller.
Gjatë dislokimit nëntëmujor në Kosovë, ushtarët e Gardës Kombëtare të Floridës kanë realizuar një numër të madh operacionesh të sigurisë.
Sipas të dhënave të Ushtrisë Amerikane, ata kanë kryer më shumë se 4.500 patrullime në kuadër të grupeve shumëkombëshe dhe 9.000 patrullime në veri të Kosovës.
Njësitë e tyre ajrore kanë realizuar gjithashtu rreth 1.900 orë fluturimi.
Si pjesë e rotacionit të planifikuar, elemente të Brigadës së Aviacionit Luftarak të Divizionit të Parë të Këmbësorisë kanë zëvendësuar edhe Batalionin e 2-të të Regjimentit të 135-të të Aviacionit të Gardës Kombëtare të Kolorados.
Ndryshimet shënojnë rikthimin e njësive të rregullta të Ushtrisë Amerikane në drejtimin e Komandës Rajonale Lindje, ndërsa misioni i KFOR-it vazhdon të mbetet përgjegjës për ruajtjen e sigurisë dhe stabilitetit në Kosovë.
