Avokati dhe politikani Spartak Ngjela ka reaguar ashpër ndaj paralajmërimeve për hapjen e një konsullate të Serbisë në Shkodër, duke e cilësuar një veprim të tillë si të papranueshëm dhe duke kërkuar reagimin e institucioneve shqiptare.
Në një postim në Facebook, Ngjela ka deklaruar se hapja e një institucioni të huaj në Shqipëri duhet të bëhet vetëm në përputhje me ligjin dhe me procedurat institucionale.
Sipas tij, një kërkesë për hapjen e konsullatës serbe në Shkodër nuk mund të pranohet pa u shqyrtuar nga institucionet kompetente dhe Parlamenti i Shqipërisë.
“Hapja e institucionit ndërkombëtar – Konsullata e Serbisë në Shkodër – është kërkesë që në Shqipëri mund të pranohet vetëm nga agjentët e Beogradit, por kurrë nga ligji dhe Parlamenti i Shqipërisë”, ka shkruar Ngjela.
Ai ka ngritur gjithashtu pikëpyetje se kush qëndron pas kësaj nisme, ndërsa ka kërkuar që shqiptarët dhe Prokuroria e Posaçme, SPAK, të reagojnë përballë asaj që ai e konsideron “akt antikombëtar”.
“Të shohim se çfarë do të bëjnë shqiptarët dhe SPAK përballë një akti të tillë antikombëtar”, ka shtuar ai.
Në një postim tjetër, Ngjela ka drejtuar akuza të forta ndaj kryeministrit Edi Rama, duke pretenduar se politika e tij ka dëmtuar interesat kombëtare të Shqipërisë.
Ngjela ka përdorur edhe pohime të rënda për prejardhjen dhe raportin e Ramës me shqiptarët. Këto deklarata përbëjnë qëndrime personale të tij.
Sipas Ngjelës, Rama e kontrollon Partinë Socialiste dhe vazhdon të qëndrojë në pushtet edhe për shkak të mbështetjes së politikës amerikane.
Megjithatë, ai pretendon se qëndrimi ndërkombëtar ndaj kryeministrit shqiptar mund të jetë duke ndryshuar.
“Por tani po kuptohet dita-ditës që kjo kohë politike nuk e pranon dot më Ramën në Shqipëri. Prisni dhe shikoni”, ka shkruar Ngjela.
Dy reagimet e tij vijnë në kohën kur çështja e një përfaqësie konsullore serbe në Shkodër ka nxitur diskutime dhe kundërshtime në opinionin publik shqiptar.
https://www.facebook.com/plugins/post.php?href=https%3A%2F%2Fwww.facebook.com%2Fspartak.ngjela%2Fposts%2Fpfbid0xykkrSu3GyNV8QKeu6doK6n5rW4Rd73p3Nd6o691mgwAx5P9XY75gR94bBWkm5fMl&show_text=true&width=500https://www.facebook.com/plugins/post.php?href=https%3A%2F%2Fwww.facebook.com%2Fspartak.ngjela%2Fposts%2Fpfbid029kyyQiknC9MrTE4Eom9subyLUNJVKBNAES3mgaEWn99BzpC58mDhNthCT7jw5UnPl&show_text=true&width=500
