Situata e jashtëzakonshme pas shpalljes së coronavirusit si pandemi globale nga Organizata Botërore e Shëndetësisë, ka pushtuar edhe Kosovën. Ndonëse ende asnjë rast nuk është shënuar, institucionet shtetërore kanë marrë masa të ndryshme preventive, duke ndaluar mësimin e shumë aktivitete të tjera.
Mirëpo në tërë këtë situatë, një gjë ende nuk është e qartë, se a do të mbahen apo jo zgjedhjet e parapara për 15 mars, në Komunën e Podujevës.
Zyra e Presidencës, të kontaktuar nga IndeksOnline, kanë bërë të ditur se përgjegjës për organizimin dhe implementimin e zgjedhjeve në Kosovës është Komisionin Qëndror i Zgjedhjeve, dhe se vetëm ata mund të ndryshojnë afatet kohore.
“KQZ-ja si përgjegjëse për organizimin dhe implementimin e zgjedhjeve në Kosovë mund t’i ndryshojë afatet kohore nëse kjo nevojitet për shkak të rrethanave. Nëse KQZ-ja vlerëson së është e pamundur të mbahen zgjedhjet e parakohshme në Podujevë në datën e shpallur nga presidenti, atëherë duhet t’i drejtohet presidentit me kërkesë zyrtare për shtyrje të datës”, thuhet në përgjigjen e presidencës për IndeksOnline.
Ndryshe, Nexhmi Rudari, Shpejtim Bulliqi dhe Naim Fetahu janë kandidatë që synojnë postin e të parit të Podujevës.
