Arbër Zaimi nga Lëvizja Vetëvendosje ka reaguar pas deklaratës së kryeministrit të Shqipërisë, Edi Ramës në Kuvendin shqiptarë, për aktakuzën e Gjykatës Speciale ndaj presidentit të Kosovës, Hashim Thaçit dhe kreut të PDK-së, Kadri Veseli.
Ai në postimin e tij në Facebook, ka shkruar se Rama nuk ka pasur kohë t’i mendojë shumë këto punë në kohët kur bashkë me Batonin e me Thaçin ndihmonin normalizimin e Vuçiqit, bënin projekte me të, hanin darka e flisnin me buzët vesh më vesh.
Postimi i plotë:
Rama po mban një fjalim të gjatë e të fortë përballë Kujtim Gjuzit dhe Myslym Murrizit, të cilëve po u thotë të vërtetën që kurrë nuk ia ka thënë ndërkombëtarëve që e kanë nxitur të shkojë te Vuçiqi, por as Vuçiqit.
Aty po tregon se si Serbia është xhelati e Kosova viktima, por në vitet e fundit ky raport qenka përmbysur dhe Serbia po del si viktimë e Kosova si xhelat.
Kjo e paska prekur shumë Ramën, i cili nuk ka pasur kohë t’i mendojë shumë këto punë në kohët kur bashkë me Batonin e me Thaçin ndihmonin normalizimin e Vuçiqit, bënin projekte me të, hanin darka e flisnin me buzët vesh më vesh.
Vuçiqi është ministër i Millosheviqit, dhe Serbia ka shumë faje e krime, për gjenocid e çkamos. Por nuk do të duhej të normalizohej pikërisht nga pushtetarët shqiptarë ai vend, apo jo, z. Rama? Ju s’jeni fëmijë, që t’ju tërheqin prej hunde kështu…