Xhevat Prekazi, ish-futbollisti nga Kosova dhe tani ndihmëstrajneri i Serbisë U21, e ka nxjerrë në ankand fanellën e vet me Partizanin e Beogradit, të nënshkruar, në mënyrë që t’i ndihmojë viktimat e tërmetit vdekjeprurës në Turqi.

Turqia jugore dhe Siria veriore u goditën nga një tërmet i fuqishëm 7.8 ballësh mëngjesin e hershëm të 6 shkurtit, i cili i ka vrarë mbi 38 mijë njerëz në të dy vendet.

Numri i përgjithshëm i të vdekurve vetëm në Turqi që prej ditës së tërmetit është rritur në 31.643, sipas autoriteteve vendase.

Prekazi, i cili karrierën e nisi në klubin e vendlindjen në Mitrovicë KF Trepça para se t’i bashkohej Partizanit në Beograd, ka vendosur ta shesë në ankand fanellën e nënshkruar të ish-klubit të tij serb dhe paratë e mbledhur nga shitja e saj t’i dhurojë për viktimat e tërmetit.

“Të mos mendojmë vetëm për të sotmen por edhe për të nesërmen për viktimat e tërmetit”, shkroi Prekazi të hënën në Twitter, ku e vendosi fanellën në shitje.

Ish-mesfushori 65-vjeçar i kaloi nëntë vite në Partizan në kryeqytetin serb, ku edhe jeton sot e asaj dite, para se të bënte karrierë të madhe në Turqi, ku luajti për gjigantin Galatasaray për gjashtë sezone.

Javën e kaluar, ai e shiti për rreth 10 mijë euro fanellën e vet të Galatasarayt dhe ato para i dhuroi për viktimat e tërmetit në Turqi.

 

Prekazi, i lindur në Remont të Mitrovicës nga prindër shqiptarë, tani është ndihmëstrajner i ekipit kombëtar U21 të Serbisë.

Në një intervistë në dhjetor të vitit 2022, Prekazi e pranoi se shkon rrallë në vendlindjen e vet në Remont të Mitrovicës.

“Vitin e kaluar isha për pak atje. Pashë tre nga miqtë e mi nga rruga. Pjesa tjetër fatkeqësisht nuk është gjallë. Nuk kam parë askënd nga Remonti, përpos Miletoviqit që është këtu në Beograd”, kishte thënë ai.