Iljasa Fazliu, logopedi që ishte arrestuar në nëntor të vitit 2022 pas publikimit të një audio-incizimi ku dëgjohej duke fyer një fëmijë 3- vjecar është në mesin e kandidatëve që kanë plotësuar kriteret për pozitën e shefit të Shërbimit të Logopedisë në Klinikën e Otorinolaringologjisë në Qendrën Klinike Universitare të Kosovës (QKUK).
Kjo bëhet e ditur në njoftimin e QKUK -së për verifikimin paraprak të kandidatëve që kanë aplikuar në konkursin e shpallur më 8 tetor shkruan Gazeta Shneta.

Emri i Iljasa Fazliut kishte marrë jehonë në nëntor të vitit 2022, pas publikimit të një audio-incizimi nga ordinanca e tij private në Gjilan, ku dëgjohej duke përdorur gjuhë fyese ndaj një pacienteje trevjeçare me autizëm.
Pas rastit, Fazliu ishte arrestuar nga Policia e Kosovës dhe ndaj tij ishte ngritur aktakuzë për veprën penale “Trajtimi i pandërgjegjshëm mjekësor”.
Në atë kohë, ai mbante pozitën e ushtruesit të detyrës së shefit të Shërbimit të Logopedisë në Klinikën e Otorinolaringologjisë në QKUK, nga e cila ishte larguar pas publikimit të rastit.
Megjithatë, procedura gjyqësore kishte përfunduar me aktgjykim lirues në tetor të vitit 2024.
E për pozitën e shefit të Shërbimit të Logopedisë, përveç Fazliut, kriteret e konkursit i kanë plotësuar edhe Zahide Rraci dhe Granit Haliti. Të tre janë përfshirë në listën e kandidatëve që do të vazhdojnë në fazën e ardhshme të rekrutimit.
Në të njëjtin njoftim janë publikuar edhe rezultatet e verifikimit paraprak për dy pozita të tjera.
Për pozitën e zyrtarit të lartë ligjor në Zyrën për Çështje Juridike në QKUK, kriteret i kanë plotësuar Bajram Miftari dhe Blerona Nevolani.
Ndërkaq, për pozitën e zyrtarit të lartë certifikues në Zyrën e Drejtorit të QKUK-së, në listë janë përfshirë Shkurte Sopi Zeqiri dhe Arjeta Mehmeti, të cilat po ashtu i plotësojnë kriteret e konkursit.
Detajet e tjera i gjeni KETU./Gazeta Shneta/

