Nëntë fuqitë bërthamore të botës shpenzuan 119 miliardë dollarë për arsenalet e tyre në vitin 2025. Britania kalon Rusinë dhe ngjitet në vendin e tretë.
Shpenzimet globale për armët bërthamore arritën një nivel rekord në vitin 2025, me nëntë shtetet që zotërojnë arsenale bërthamore duke shpenzuar gjithsej 119 miliardë dollarë, sipas një raporti të publikuar nga Fushata Ndërkombëtare për Shfuqizimin e Armëve Bërthamore (ICAN).Raporti tregon se shpenzimet u rritën me 19% krahasuar me vitin 2024, duke shënuar nivelin më të lartë që nga viti 2020, kur ICAN nisi monitorimin vjetor të investimeve bërthamore të Shteteve të Bashkuara, Rusisë, Kinës, Francës, Britanisë së Madhe, Indisë, Pakistanit, Koresë së Veriut dhe Izraelit.Shtetet e Bashkuara mbeten lideri absolut në këtë garë, duke shpenzuar 69.2 miliardë dollarë vetëm gjatë vitit të kaluar. Sipas raportit, kjo shumë është më e madhe se shpenzimet e kombinuara të të gjitha fuqive të tjera bërthamore.
Po ashtu, Washingtoni regjistroi rritjen më të madhe vjetore, me 22%, ndërsa ICAN vlerëson se kjo lidhet si me rritjen e përgjithshme të buxhetit ushtarak, ashtu edhe me modernizimin e arsenalit strategjik amerikan.
Kina renditet e dyta me 13.5 miliardë dollarë shpenzime për armët bërthamore, duke regjistruar një rritje prej 7%.
Sipas raportit, renditja e fuqive bërthamore për nga niveli i shpenzimeve është: Shtetet e Bashkuara, Kina, Britania e Madhe, Rusia, Franca, India, Pakistani, Koreja e Veriut dhe Izraeli.
ICAN, fituese e Çmimit Nobel për Paqen në vitin 2017, argumenton se rritja e vazhdueshme e investimeve në armët bërthamore po ndodh në një kohë kur tensionet gjeopolitike po shtohen në disa rajone të botës.
