Edhe analisti politik Agron Demi, ka reaguar pas paralajmërimit të presidentit, Hashim Thaçi për formimin e Qeverisë së re dhe njoftimit të Emisarit Special të Presidentit Donald Trump, Richard Grenell për rifillimin e dialogut mes Kosovës e Serbisë.
Ai thotë se presidenti aktual i Kosovës, Hashim Thaçi, ka dy kanale dhe mesazhe komunikimi.
Demi me tej potencon se mediave ndërkombëtare u thotë se, si një ‘boshkobuhë’, ai vetë ka qëndruar larg vijave të frontit, a në mediat vendore fyen si ‘boshkobuhë’ luftëtarët e vërtetë si Anton Quni.
Tutje, ai gjithashtu thotë se Thaçi në Kosovë i bën homazhe Rugovës, kurse në Vjenë, Paris e Londër e promovon biografinë e sponsorizuar nga ai ku Rugova etiketohet si alkoolist kronik.
Ja shkrimi i tij:
Presidenti i ka dy kanale dhe mesazhe komunikimi:
Tëitter-in e përdorë për me lajmëru heqjen e reciprocitetit ndaj Serbisë, a facebook-un e përdorë ashtu si PLAN-i për me kritiku 1000 donacionet për testet e Covid-19 nga Serbia.
Mediave ndërkombëtare u thotë se, si një ‘boshkobuhë’, ai vetë ka qëndru larg vijave të frontit, a në mediat vendore fyen si ‘boshkobuhë’ luftëtarët e vërtetë si Anton Quni.
Kur partia e tij është në pushtet Kushtetuta interpretohet si ‘nuk ka qeveri pa fituesin e zgjedhjeve’, kur është në opozitë qeveritë krijohen edhe duke anashkalu fituesin.
Kur situata është e zakonshme ai kërkon shpallje të gjendjes së jashtëzakonshme; e kur situata bahet e jashtëzakonshme, ai sillet zakonshëm, ngase dikush si ai në kriza funksionon më së miri.
Në Kosovë i bën homazhe Rugovës, e në Vjenë, Paris e Londër e promovon biografinë e sponsorizuar nga ai ku Rugova etiketohet si alkoolist kronik…
Për shumëkë kjo disonancë konjitive kish me qenë dërmuese për shëndetin, po jo për Presidentin, ai kështu mbijeton.
