Presidenti francez, Emanuel Macron, i ka kërkuar Ukrainës që të bëjë lëshime në lidhje me sovranitetin e saj, konfirmoi presidenti ukrainas Volodymyr Zelensky.
Në një intervistë me televizionin kombëtar të Italisë RAI, Zelenski u pyet për komentin e Macron në fillim të kësaj jave se si Evropa duhet të shmangë poshtërimin e Putinit.
“Ne duam që ushtria ruse të largohet nga vendi ynë, ne nuk jemi në tokën ruse”, tha Zelensky. “Ne nuk duam të ndihmojmë Putinin të shpëtojë fytyrën e tij duke paguar me territorin tonë. Kjo do të ishte e padrejtë”, nënvizoi ai.
Zelensky shtoi se Ukraina nuk do ta njohë kurrë aneksimin e Krimesë nga Rusia. “Macron më kot kërkoi një rrugëdalje për Rusinë”, tha ai. Pallati Elysee hodhi poshtë akuzat e Zelenskit.
“Presidenti i Republikës kurrë nuk ka diskutuar asgjë me Vladimir Putin pa pëlqimin e Presidentit Zelensky dhe kurrë nuk i ka kërkuar Presidentit Zelensky ndonjë lëshim. Ai gjithmonë ka thënë se u takon ukrainasve të vendosin për kushtet e negociatave të tyre me Rusët”, tha sot zyrtari i Pallatit Elysee.
Duke folur në ceremoninë përmbyllëse të Konferencës për të Ardhmen e Evropës të hënën, Macron tha se Evropa “nuk duhet t’i nënshtrohet kurrë tundimit të poshtërimit apo frymës së hakmarrjes për çështjen e luftës ruse kundër Ukrainës”.
Macron tha gjithashtu se “kur paqja të kthehet në tokën evropiane, ne do të duhet të ndërtojmë garanci të reja sigurie”. Kjo referencë u lexua si një tregues se Macron ende po përpiqet të arrijë një kompromis me Putinin.
